കൊച്ചി: സംസ്ഥാനത്ത് വേനല് ചൂടില് കുളിര്മയേകാനായി കുടുംബശ്രീയുടെ ഗുണമേന്മയുള്ള വിഷരഹിത തണ്ണിമത്തന് വിപണിയിലൂടെയുള്ള വിറ്റുവരവ് 6.78 കോടി രൂപ.
കുടുംബശ്രീ കഴിഞ്ഞ ഡിസംബറില് തുടക്കമിട്ട വേനല്മധുരം തണ്ണിമത്തന്കൃഷി കാമ്പയിന്റെ ഭാഗമായി ഉത്പാദിപ്പിച്ച തണ്ണിമത്തനുകളുടെ വില്പനയിലൂടെയാണ് ഈ നേട്ടം.
മാര്ച്ച് അവസാനവാരം മുതല് ഇന്നലെവരെയുള്ള കണക്കാണിത്. 3.91 കോടി രൂപയുടെ വിറ്റുവരവുമായി കാസര്ഗോഡ് ജില്ലയാണ് മുന്നില്. ഇവിടെ 2, 793 ടണ് തണ്ണിമത്തനാണു കൃഷി ചെയ്തത്. 99.54 ലക്ഷം രൂപയുടെ വിറ്റുവരവുമായി മലപ്പുറം ജില്ല രണ്ടാം സ്ഥാനത്തും 80.24 ലക്ഷം രൂപയുടെ വിറ്റുവരവുമായി തൃശൂര് ജില്ല മൂന്നാം സ്ഥാനത്തുമുണ്ട്.
പദ്ധതിയുടെ ഭാഗമായി 14 ജില്ലകളിലുമായി കുടുംബശ്രീയുടെ കൂട്ടുത്തരവാദിത്വ സംഘങ്ങള് അഥവ ജോയിന്റ് ലയബിലിറ്റി ഗ്രൂപ്പുകള് (ജെഎല്ജി) 817.78 ഏക്കറിലാണു തണ്ണിമത്തന് കൃഷി ചെയ്തത്. 44,55,680 ടണ് തണ്ണിമത്തന് ഉത്പാദിപ്പിച്ചു. ആകെ 6,711 സിഡിഎസുകളിലായി 817.78 ഏക്കര് സ്ഥലത്താണ് വേനല് മധുരം തണ്ണിമത്തന് കൃഷി ചെയ്തത്.
കിരണ്, മഹാരാജ, അപൂര്വ, ഷുഗര് ബേബി, പക്കീസ, ഷുഗര് ക്വീന്, ജൂബിലി കിംഗ്, യെല്ലോ മഞ്ച്, ഓറഞ്ച് ഡിലൈറ്റ് അര്ക്ക, മ്യൂക്കാസ, നാംധാരി, ഇറാനി, സ്വാമ, തുടങ്ങിയ ഇനങ്ങളാണു കൃഷി ചെയ്തത്.